Posts Tagged ‘شؤون دينية’

إفتتاح ساحة إلياس جرجس كتورة في داربعشتار

16/05/2016

بمناسبة الذكرى الأربعين قام أهالي داربعشتار في 15/5/2016 بافتتاح ساحة تضمنت تمثالاً لمار جرجس قرب كنيسة القرية على نية المرحوم “الياس كتورة”. كما ألقى “فادي الغاوي” كلمة في المناسبة باسم “شبيبة داربعشتار” ننشر نصها:

156 (1)

أباء داربعشتار.. أهل المرحوم “إلياس كتورة”.. أهل ضيعتي وشبابا،

من أربعين يوم، خيّنا “إلياس” ترك الأرض. بـِ تعليمنا المسيحي، الموت هوي قيامة. النهاية هيي مجرد بداية لطريق جديد.. لحياة جديدة. الله بْـ يختار قدَر ولادو، وِختار “إلياس” ليكون حدّو بعالم تاني. اللي بقيوا، علييون واجب وحمل إنو يتذكرو اللي راحوا.. وكيف إذا كان اللي راح غالي عا قلبنا وقلب كل داربعشتار؟

يوم قررنا نعمل ساحة وتمثال لـ “إلياس”، كانت الفكرة صعبة وهينة بنفس الوقت. صعبة لأن مع كل حجر حطيناه بالساحة ما غاب خيال “إلياس” عن بالنا.. وهينة لأن كل الناس ساعدتنا وعرضت تساعدنا.

بعد موافقة الأهل والكنيسة والبلدية بلشنا الشغل. ما بدي إشكر كل شخص بشخصو، لأن ما حدا ساعد لينذكر إسمو. قدّام الموت، ما حدا طالِب مجد وشهرة.

بالماضي، بتاريخ ضيعتنا وبقية ضيع جبالنا – والكبار أكيد بيتذكروا – كانت “العونة” تميّز ضِيعنا وطريقة حياة الناس. كان اللي يخلّص موسم الزيتون عا بكير يساعد غيرو. واللي بدو يعمّر بيت وما قادر، كانت بقية الناس تساعدو بالعمار. اللي صار معنا بالشهر الماضي بيشبه “العونة” لي كانت تصير من زمان. الناس تعرض المساعدة علينا بلا طلب.. تقدّم شو قادرة لتخدم الضيعة وأهلا وتتذكر “إلياس”.

من فترة سميناه “حارس الوادي”.. وقلنا عنو “شيخ الشباب”. المهندس “إلياس” كان خيّنا، واللي عملناه هو أقل الواجب. تمثال “مار جرجس” قدام كنيسة داربعشتار نعمل لرفيقنا، بس هوي علامة لنتذكر كل لي تركونا. و “الياس”، يا رفيقي وخيي.. منوعدك تضل بصلاتنا كلما صلينا، وتضل ببالنا كلما اجتمعنا.

ولأهلك.. منقلك إنو نحنا حدّون. غياب الإبن صعب على الأهل والإخوة.. وقد ما نحزن ونعصب ونبكي، ما بيوصل زعلنا لحدود دمعة إم أو غصة بيّ. وإنتي من فوق مطرح ما إنتي، شايفون وشايفنا مجتمعين كرمالك.. من قلك إنو رفقات جامعتك وشغلك وأهلك إشتاقولك، وغيابك ما بيتعوّض.. ومنوعدك نضل حدون متل ما إنتي كنتْ دايماً.

ولـ “شبيبة داربعشتار”.. خلونا دايماً نكون هيك.. إللي صار من أربعين يوم لليوم منو صدفة، ولا هوي عادي وهيّن: الروح الطيبة.. الأخوّة.. حب المساعدة.. التضحية.. الشغل.. وخدمة الخير.. هيي صفاتنا، ولازم تضل هيك. ما بدنا تكون الخسارة والموت بس هني لي بيجمعونا، بدنا نضل إيد وحدة لنضل أقوى، وأفعل، وأنشط.

وكلمة أخيرة للحاضرين اليوم معنا.. إنتو دليل حيّ على إنو نحنا شعب ما بموت.. إنتو دليل حيّ على إنو الموت قد ما كان قاسي، منعمل منو ذكرى.. إنتو دليل حيّ على إنو بس نحط إيدنا بإيدين بعض منقدر نكسّر صخور ونعملا تماسيل.. إنتو دليل حيّ إنو الوقفة حد المحزون والترتيلة بتعزي قلوب ملياني وجع.. إنتو دليل حيّ على إنو نحنا شعب ما بموت وقت لي من كون واقفين حد بعضنا.

بإسمي وبإسم “شبيبة داربعشتار” بدنا نشكر البلدية والوقف وكل شخص قدّم خدمة لنعمل ساحة ونتذكر “إلياس” اليوم، وبكرا.

156 (3)

الإعلانات

%d مدونون معجبون بهذه: